اسلام آباد: ملک میں پیٹرولیم مصنوعات کی قیمتوں میں ایک بار پھر اضافہ کر دیا گیا ہے، جس کے ساتھ حکومت نے عوام پر مزید مالی بوجھ ڈال دیا ہے۔
ذرائع کے مطابق حکومت نے پیٹرول پر پیٹرولیم لیوی میں 13 روپے 91 پیسے فی لیٹر اضافہ کیا ہے، جس کے بعد پیٹرول پر لیوی کی نئی شرح 117 روپے 41 پیسے فی لیٹر تک پہنچ گئی ہے۔
اسی طرح ہائی اسپیڈ ڈیزل پر بھی پیٹرولیم لیوی میں 13 روپے 91 پیسے فی لیٹر اضافہ کیا گیا ہے، جس کے بعد ڈیزل پر لیوی 42 روپے 60 پیسے فی لیٹر مقرر ہو گئی ہے۔
گزشتہ شب پیٹرولیم ڈویژن کی جانب سے قیمتوں میں اضافے کا باقاعدہ نوٹیفکیشن جاری کیا گیا، جس کا اطلاق 12 بجے رات سے ہو چکا ہے۔
نوٹیفکیشن کے مطابق ہائی اسپیڈ ڈیزل کی قیمت میں 15 روپے فی لیٹر اضافہ کیا گیا ہے، جس کے بعد نئی قیمت 414 روپے 58 پیسے فی لیٹر ہو گئی ہے، جبکہ اس سے قبل قیمت 399 روپے 58 پیسے تھی۔
اسی طرح پیٹرول کی قیمت میں 14 روپے 92 پیسے فی لیٹر اضافہ کیا گیا ہے، جس کے بعد نئی قیمت 414 روپے 78 پیسے فی لیٹر مقرر کی گئی ہے، جو پہلے 399 روپے 86 پیسے تھی۔
یاد رہے کہ اس سے قبل 29 اپریل کو بھی ہائی اسپیڈ ڈیزل کی قیمت میں 19 روپے 39 پیسے فی لیٹر اضافہ کیا گیا تھا۔
