لاہور: پنجاب اسمبلی میں وزیر اعلیٰ مریم نواز کی تقریر کے دوران شدید نعرے بازی اور ہنگامہ کرنے والے اپوزیشن ارکان کو اسپیکر ملک محمد احمد خان نے سخت کارروائی کا سامنا کرواتے ہوئے اجلاسوں سے معطل کر دیا۔
اسپیکر نے اسمبلی کے قاعدہ 210(3) کے تحت 26 اپوزیشن اراکین کو پندرہ اجلاسوں کے لیے معطلی کا نوٹیفکیشن جاری کیا، جس کے مطابق وہ آئندہ پندرہ سیشنز میں شرکت سے محروم رہیں گے۔
معطل ہونے والوں میں فہد مسعود، تنویر اسلم، اعجاز شفیع، رفعت محمود، یاسر محمود، کلیم اللہ خان، انصر اقبال، علی آصف، ذوالفقار علی، مجتبیٰ چوہدری، شاہد جاوید، اسماعیل، خیال احمد کاسترو، شہباز احمد، طیب راشد، امتیاز محمود، علی امتیاز، راشد طفیل، رائے مرتضیٰ، خالد زبیر، صائمہ کنول، نعیم، سجاد احمد، رانا اورنگزیب، شعیب امیر اور اسامہ علی گجر شامل ہیں۔
یہ معطلی اس وقت عمل میں آئی جب ان ارکان نے مریم نواز کی تقریر کے دوران شور شرابا کیا، ایجنڈے کے صفحات پھاڑے اور حکومتی بینچوں پر پھینکے، اور غیرپارلیمانی زبان استعمال کی، جس سے اجلاس کی کارروائی متاثر ہوئی۔
اپوزیشن کی جانب سے ردعمل بھی سامنے آیا ہے۔ رکن اعجاز شفیع نے کہا کہ پرامن احتجاج ہمارا آئینی حق ہے اور اسے دبایا نہیں جا سکتا۔ امتیاز علی نے اسپیکر پر جانبداری کا الزام عائد کیا جبکہ شعیب امیر نے طنزیہ انداز میں کہا کہ جب وزیر اعلیٰ اسمبلی سال میں ایک بار آئیں گی تو احتجاج تو لازمی ہوگا۔
ادھر اسپیکر ملک محمد احمد خان کا کہنا ہے کہ اراکین نے ایوان کے نظم و ضبط کو پامال کیا، احتجاج کا حق تسلیم شدہ ہے لیکن اس کی بھی ایک حد ہے جو آئین و قانون کے تابع ہے۔ انہوں نے عالمی پارلیمانی اصولوں کا حوالہ دیتے ہوئے ایوان میں شور شرابے کو غیرپارلیمانی رویہ قرار دیا۔
