لاہور: وزیر اعلیٰ پنجاب مریم نواز آئندہ ہفتے آذربائیجان کا سرکاری دورہ کریں گی، جہاں وہ باکو میں منعقد ہونے والے 13ویں ورلڈ اربن فورم میں شرکت کریں گی۔
تفصیلات کے مطابق وزیر اعلیٰ پنجاب عالمی فورم میں دنیا بھر کے شہروں میں رہائش اور پائیدار شہری ترقی کے موضوع پر اظہارِ خیال کریں گی۔ اس موقع پر ان کی مختلف ممالک سے آئے ہوئے اعلیٰ حکام اور سربراہانِ مملکت سے ملاقاتیں بھی متوقع ہیں۔
مریم نواز 17 مئی کو پانچ روزہ سرکاری دورے پر آذربائیجان روانہ ہوں گی، جبکہ ورلڈ اربن فورم 17 مئی سے 22 مئی تک باکو میں جاری رہے گا۔
ذرائع کے مطابق پنجاب کابینہ کے بعض صوبائی وزراء پر مشتمل ایک وفد بھی وزیر اعلیٰ کے ہمراہ اس دورے میں شریک ہوگا۔
