انقرہ: وزیراعظم شہباز شریف ترکی کے صدر رجب طیب اردوان کی دعوت پر دو روزہ دورے پر انقرہ پہنچ گئے۔
وزیراعظم کے دفتر سے جاری بیان کے مطابق وزیراعظم شہباز شریف کا ترکی کے دارالحکومت انقرہ کے ہوائی اڈے پر ترک وزیر دفاع یشار گیو لر، ڈپٹی گورنر انقرہ ظفر اور حان، پاکستان ترکیہ کلچرل ایسوسی ایشن کے صدر برہان قایاترک، پاکستان کے ترکیہ میں سفیر یوسف جنید، حکومت ترکیہ کے اعلیٰ حکام اور انقرہ میں تعینات پاکستانی سفارت کاروں نے استقبال کیا۔
بیان میں کہا گیا کہ وزیراعظم شہباز شریف ترک صدر رجب طیب اردوان سے ملاقات کریں گے اور دونوں رہنما دو طرفہ تعلقات کو مزید وسعت دینے سمیت اہم علاقائی اور عالمی امور پر تبادلہ خیال کریں گے۔ بعد ازاں دونوں رہنماؤں کے درمیان مشترکہ پریس کانفرنس بھی ہوگی۔
بیان میں مزید کہا گیا کہ اپنے قیام کے دوران وزیراعظم شہباز شریف ترک سرمایہ کاروں اور کاروباری وفود سے بھی ملاقات کریں گے۔
وزیراعظم کے ہمراہ نائب وزیرِاعظم اور وزیر خارجہ اسحاق ڈار، وزیر اطلاعات و نشریات عطا اللہ تارڑ اور معاون خصوصی طارق فاطمی بھی ہیں۔
