پاکستان کرکٹ بورڈ (پی سی بی) نے قومی ٹیم کے آل راؤنڈر محمد نواز کے نشہ آور مادے کے ٹیسٹ مثبت آنے کے معاملے پر باقاعدہ تحقیقات شروع کرنے کا فیصلہ کیا ہے۔
کرکٹ ویب سائٹ کی رپورٹ کے مطابق محمد نواز کا ڈوپ ٹیسٹ ٹی ٹوئنٹی ورلڈکپ کے دوران مثبت آیا تھا، جس کے بعد انٹرنیشنل کرکٹ کونسل (آئی سی سی) نے اس حوالے سے پی سی بی کو آگاہ کیا۔
رپورٹ میں بتایا گیا ہے کہ آئی سی سی کی جانب سے معلومات ملنے کے بعد پی سی بی نے فوری طور پر تحقیقات کا آغاز کر دیا ہے تاکہ معاملے کی مکمل حقیقت سامنے لائی جا سکے۔
مزید کہا گیا ہے کہ ٹیسٹ کے نتائج میں ایک ریکریئیشنل ڈرگ کے استعمال کی نشاندہی ہوئی ہے۔ ذرائع کے مطابق پی سی بی اس حوالے سے اپنی ابتدائی تحقیقات کی تفصیلات آج آئی سی سی کے ساتھ شیئر کرے گا۔
واضح رہے کہ محمد نواز اس وقت پاکستان سپر لیگ میں ملتان سلطانز کی نمائندگی کر رہے ہیں۔
