گورنر اسٹیٹ بینک جمیل احمد نے کہا ہے کہ ملک میں مہنگائی کی شرح بڑھ کر 7 فیصد تک پہنچنے کا امکان ہے۔
کراچی چیمبر آف کامرس سے خطاب کرتے ہوئے انہوں نے بتایا کہ رواں مالی سال کے ابتدائی نو ماہ میں معاشی ترقی کی شرح 3.7 فیصد ریکارڈ کی گئی جبکہ مہنگائی میں مزید اضافے کی توقع ظاہر کی جا رہی ہے۔
جمیل احمد کے مطابق آئندہ مالی سال کی دوسری ششماہی میں مہنگائی میں کمی آنا شروع ہو جائے گی۔ انہوں نے کہا کہ جون 2028 تک ایس ایم ایز کی فنانسنگ کو بڑھا کر 1500 ارب روپے تک لے جانے کا ہدف مقرر کیا گیا ہے۔
گورنر اسٹیٹ بینک نے کہا کہ اندرونی قرضوں کے حجم میں اضافہ ہوا ہے جبکہ بیرونی قرضوں میں کمی لائی گئی ہے۔ ان کا کہنا تھا کہ عالمی معاشی حالات کے باعث برآمدات متاثر ہوئی ہیں اور رواں مالی سال کے برآمدی اہداف میں تقریباً 2 ارب روپے کی کمی دیکھی گئی ہے۔
انہوں نے مزید بتایا کہ نئے کرنسی نوٹوں کی تیاری پر کام جاری ہے اور اس سلسلے میں حکومت سے منظوری کا عمل بھی جاری ہے۔
