ضلعی انتظامیہ نے عیدالاضحیٰ 2026 کے موقع پر قربانی کے جانوروں کی خرید و فروخت کیلئے شہر اور گردونواح میں پانچ مویشی سیل پوائنٹس مقرر کر دیے ہیں۔ اس حوالے سے ڈپٹی کمشنر محمد نعمان صدیق نے منظور شدہ سیل پوائنٹس کا باقاعدہ نوٹیفکیشن جاری کر دیا ہے۔ نوٹیفکیشن کے مطابق فاطمہ جناح ٹاؤن، جیسونت گڑھ، شجاع آباد اور جلالپور پیر والا میں عارضی مویشی منڈیاں قائم کی جائیں گی جبکہ جیسونت گڑھ کی کیٹل منڈی اور کیمل منڈی کو بھی عیدالاضحیٰ کیلئے منظور شدہ سیل پوائنٹس میں شامل کیا گیا ہے۔ ضلعی انتظامیہ کے مطابق شجاع آباد میں سلیم شاہ پٹرولیم سنٹر کے قریب عارضی سیل پوائنٹ قائم کرنے کی منظوری دی گئی ہے جبکہ جلالپور پیر والا میں ویٹرنری یونیورسٹی کے سامنے ملتان روڈ پر مویشی سیل پوائنٹ قائم ہوگا۔ ڈپٹی کمشنر محمد نعمان صدیق نے متعلقہ اداروں کو ہدایت کی ہے کہ مویشی منڈیوں میں صفائی، سکیورٹی اور ٹریفک مینجمنٹ کیلئے خصوصی اقدامات یقینی بنائے جائیں۔ انہوں نے پینے کے صاف پانی، لائٹنگ اور دیگر بنیادی سہولیات کی فراہمی کو بھی یقینی بنانے کا حکم دیا ہے تاکہ شہریوں کو خریداری کے دوران کسی قسم کی دشواری کا سامنا نہ ہو۔
