دبئی کی ایک بجٹ ایئرلائن نے پاکستان کے تین بڑے شہروں کے لیے اپنی پروازیں عارضی طور پر معطل کرنے کا فیصلہ کیا ہے۔
رپورٹ کے مطابق متحدہ عرب امارات کی اس ایئرلائن نے آپریشنل مسائل کے باعث لاہور، اسلام آباد اور پشاور کے لیے فلائٹ آپریشن 26 اکتوبر 2026 تک روک دیا ہے۔
ایئرلائن انتظامیہ کا کہنا ہے کہ دیگر شہروں جن میں کراچی، سیالکوٹ، ملتان، فیصل آباد اور کوئٹہ شامل ہیں، وہاں پروازیں معمول کے مطابق جاری رہیں گی۔
مزید بتایا گیا ہے کہ دیگر اماراتی ایئرلائنز کی پاکستان کے لیے پروازیں بدستور فعال ہیں اور ان کے شیڈول میں کوئی تبدیلی نہیں کی گئی۔
انتظامیہ کے مطابق متاثرہ مسافروں کے لیے ٹکٹ ریفنڈ کا عمل شروع کر دیا گیا ہے جبکہ سہولت کے طور پر دیگر ایئرلائنز پر ری بکنگ کا آپشن بھی فراہم کیا جا رہا ہے تاکہ مسافروں کو مشکلات کا سامنا نہ ہو۔
واضح رہے کہ خطے میں جاری صورتحال کے باعث خلیجی فضائی آپریشنز پہلے ہی دباؤ کا شکار ہیں، جبکہ دبئی ایئرپورٹ پر مسافروں کی تعداد میں نمایاں کمی بھی رپورٹ کی گئی تھی۔
ماہرین کے مطابق اس فیصلے سے نہ صرف سفری منصوبہ بندی متاثر ہوگی بلکہ بیرون ملک مقیم پاکستانیوں کے لیے سفری سہولیات بھی محدود ہوں گی، تاہم حالات بہتر ہونے پر روٹس کی بحالی کا امکان ظاہر کیا جا رہا ہے۔
