اراکین کی معطلی کے بعد اپوزیشن اسمبلی اجلاس بلانے کے اختیار سے محروم

لاہور: پنجاب اسمبلی میں ہنگامہ آرائی کے بعد اپوزیشن مزید مشکلات کا شکار ہو گئی، معطل شدہ اراکین کے باعث اسمبلی اجلاس بلانے کا قانونی اختیار بھی ختم ہو گیا۔
ذرائع کے مطابق پنجاب اسمبلی میں اپوزیشن کے مجموعی طور پر 105 اراکین موجود ہیں، لیکن حالیہ معطلی کے بعد 26 اراکین اسمبلی کارروائی سے باہر ہو چکے ہیں، جس کے بعد اپوزیشن کی فعال تعداد 79 رہ گئی ہے۔
اسمبلی قواعد کے تحت اجلاس بلانے کے لیے ریکوزیشن پر کم از کم 93 اراکین کے دستخط درکار ہوتے ہیں، تاہم معطل اراکین کی واپسی تک یہ مطلوبہ تعداد پوری نہیں ہو سکتی۔
یہ صورتحال اپوزیشن کے لیے ایک بڑا آئینی اور عملی چیلنج بن چکی ہے، کیونکہ جب تک معطل ارکان بحال نہیں ہوتے، اپوزیشن اجلاس بلانے کی قانونی طاقت سے محروم رہے گی۔