اسلام آباد: پاکستان کو بین الاقوامی مالیاتی ادارے (آئی ایم ایف) کے ریزیلینس اینڈ سسٹین ایبلٹی فیسلٹی پروگرام کے تحت 200 ملین ڈالر ملنے کا امکان ظاہر کیا جا رہا ہے۔
تفصیلات کے مطابق واشنگٹن میں ہونے والے عالمی مالیاتی اجلاسوں کے دوران کلائمٹ فنانسنگ کے حوالے سے اہم پیشرفت سامنے آئی ہے، جس کے بعد ماحولیاتی تبدیلی سے نمٹنے کے لیے عالمی سطح پر عملی اقدامات پر زور بڑھ گیا ہے۔
اس حوالے سے پاکستان نے بھی کلائمٹ ایکشن کے لیے مالی وسائل اور بجٹ ترجیحات پر اپنا مؤقف پیش کیا ہے اور ماحولیاتی منصوبوں کے لیے بین الاقوامی مالی تعاون میں اضافے پر مشاورت جاری ہے۔
ذرائع کے مطابق آئی ایم ایف بورڈ کا اہم اجلاس جمعہ کے روز متوقع ہے، جس میں پاکستان سے متعلق اہم فیصلے ہونے کا امکان ہے۔
حکومت نے ماحولیاتی چیلنجز سے نمٹنے کے لیے ادارہ جاتی تعاون کو مزید مؤثر بنانے کا فیصلہ کیا ہے، جبکہ قومی بجٹ اور وسائل کی تقسیم میں کلائمٹ پالیسی کو بھی ترجیح دینے کا عندیہ دیا گیا ہے۔
واضح رہے کہ عالمی مالیاتی ادارے ترقی پذیر ممالک کے لیے ماحولیاتی فنڈنگ میں اضافے پر زور دے رہے ہیں۔
