اسلام آباد: گلگت بلتستان میں پیپلز پارٹی کی کامیابی پر وزیراعظم شہباز شریف کی قیادت کا مبارکباد کا اظہار
وزیراعظم شہباز شریف نے گلگت بلتستان میں پاکستان پیپلز پارٹی کی انتخابی کامیابی پر صدر آصف علی زرداری اور بلاول بھٹو زرداری کو مبارکباد پیش کی ہے۔
وزیراعظم نے اپنے بیان میں گلگت بلتستان میں شفاف، پرامن اور سیاسی سرگرمیوں سے بھرپور انتخابات کے انعقاد پر وہاں کے عوام کو بھی خراجِ تحسین پیش کیا۔
انہوں نے کہا کہ پاکستان پیپلز پارٹی گلگت بلتستان انتخابات میں اکثریتی جماعت کے طور پر سامنے آئی ہے جس پر پارٹی قیادت مبارکباد کی مستحق ہے۔ انہوں نے صدر آصف علی زرداری اور بلاول بھٹو زرداری کو خصوصی طور پر مبارکباد دی۔
شہباز شریف نے پاکستان مسلم لیگ (ن) کے امیدواروں کی کارکردگی کو بھی سراہتے ہوئے کہا کہ انہوں نے بھرپور مقابلہ کیا اور پارٹی کی ٹیم نے قابلِ تحسین محنت کی۔ انہوں نے تمام کامیاب امیدواروں کو بھی مبارکباد دی۔
وزیراعظم نے کہا کہ گلگت بلتستان کے عوام نے سیاسی عمل میں بھرپور شرکت کر کے جمہوری روایت کو مضبوط بنایا، جو قابلِ ستائش ہے۔
انہوں نے مزید کہا کہ پرامن اور شفاف انتخابات جمہوریت کا حسن ہیں، اور الیکشن کمیشن نے غیر جانبدارانہ عمل کو یقینی بنا کر قابلِ تعریف کردار ادا کیا۔ پولیس اور دیگر قانون نافذ کرنے والے اداروں کی کارکردگی کو بھی سراہا گیا۔
