اسلام آباد: وزیراعظم شہباز شریف سے پاکستان تحریک انصاف کے حمایت یافتہ آزاد رکن قومی اسمبلی چوہدری عثمان علی نے ملاقات کی۔ ملاقات میں وزیر اعظم کے مشیر رانا ثنا اللہ بھی شریک تھے۔ وزیراعظم نے چوہدری عثمان علی کو پاکستان مسلم لیگ ن میں شامل ہونے پر مبارکباد دی۔ رکن قومی اسمبلی نے حکومتی پالیسیوں پر اعتماد کا اظہار کیا اور آئندہ سال کے بجٹ کی قومی اسمبلی میں منظوری پر وزیراعظم کو مبارکباد پیش کی۔ ملاقات کے دوران ساہیوال کے حلقے سے متعلق اہم امور پر بھی گفتگو ہوئی۔ چوہدری عثمان علی این اے 142 ساہیوال سے آزاد حیثیت میں منتخب ہوئے تھے، مگر اب وہ ن لیگ کے رکن بن گئے ہیں۔
