اسلام آباد: نئے مالی سال کے وفاقی بجٹ کی پیشکش میں تاخیر، 12 جون کو پیش کیے جانے کا امکان
نئے مالی سال کا وفاقی بجٹ مزید تاخیر کا شکار ہو گیا ہے اور اب اسے 12 جون کو پیش کیے جانے کا امکان ظاہر کیا جا رہا ہے۔
ذرائع کے مطابق آئندہ مالی سال کے بجٹ کی تیاریوں میں اہم پیش رفت سامنے آئی ہے، تاہم شیڈول میں ردوبدل کے باعث بجٹ کی پیشکش مؤخر ہو سکتی ہے۔ پہلے یہ بجٹ 10 جون کو پیش کیے جانے کا امکان تھا۔
حکومتی ذرائع کا کہنا ہے کہ قومی اقتصادی کونسل کا آج ہونے والا اجلاس بھی ملتوی کر دیا گیا ہے، جس میں آئندہ مالی سال کے ترقیاتی بجٹ اور اہم معاشی اہداف کی منظوری دی جانی تھی۔
اجلاس کی صدارت وزیراعظم شہباز شریف نے کرنا تھی جبکہ نئے شیڈول کا اعلان بعد میں کیا جائے گا۔ اجلاس میں وفاقی اور صوبائی ترقیاتی منصوبوں، سالانہ ترقیاتی پروگرام اور معاشی ترقی کے اہداف پر غور ہونا تھا۔
ذرائع کے مطابق نئے مالی سال کے لیے مجوزہ ترقیاتی بجٹ کا حجم 4 ہزار 715 ارب روپے رکھا گیا ہے، جس میں وفاقی پی ایس ڈی پی کے لیے 1126 ارب روپے اور صوبائی ترقیاتی منصوبوں کے لیے 3 ہزار 138 ارب روپے تجویز کیے گئے ہیں۔
مزید یہ کہ ریاستی ملکیتی ادارے اپنے ترقیاتی منصوبوں پر 451 ارب روپے خرچ کریں گے۔
ذرائع کے مطابق پی ایس ڈی پی میں 200 ارب روپے اضافے کی تجویز بھی زیر غور ہے، جس کی منظوری کی صورت میں مجموعی ترقیاتی بجٹ 1326 ارب روپے تک بڑھ سکتا ہے۔
