اسلام آباد: محکمہ موسمیات نے ملک کے مختلف شہروں میں 9 مارچ سے بارشوں کا نیا سلسلہ شروع ہونے کی پیشگوئی کی ہے، جس کے نتیجے میں اربن فلڈنگ، لینڈ سلائیڈنگ اور برفباری کے باعث راستے بند ہونے کا امکان ہے۔
محکمہ موسمیات کے مطابق مغربی ہواؤں کا سلسلہ 9 مارچ کو شمالی علاقوں میں داخل ہوگا اور 16 مارچ تک ملک کے مختلف حصوں میں بارشوں کا سبب بنے گا۔ اس دوران چترال، مری، گلگت بلتستان اور کشمیر میں موسلادھار بارشیں متوقع ہیں۔
مختلف شہروں میں بارشوں کی تفصیلات:
محکمہ موسمیات کے مطابق مغربی ہواؤں کا سلسلہ 9 مارچ سے ملک کے شمالی علاقوں میں داخل ہوگا اور مغربی ہواؤں کا یہ سلسلہ ملک میں 16 مارچ تک برقرار رہے گا۔
محکمہ موسمیات نے 9 سے 16 مارچ کے دوران چترال، مری، گلگت بلتستان اور کشمیر میں بارشوں کی پیشگوئی کی۔
محکمہ موسمیات نے بتایاکہ 10 مارچ کو اسلام آباد، راولپنڈی، اٹک، جہلم، چکوال، پشاور، چارسدہ اور مردان میں بارش متوقع ہے جبکہ 12 سے 16 مارچ کے دوران پنجاب کے بیشتر شہروں میں بارشوں کی توقع ہے۔
محکمہ موسمیات کے مطابق 14 اور 15 مارچ کو بلوچستان کے علاقوں میں گرج چمک کے ساتھ بارشوں کا امکان ہے اور بارشوں کے باعث اسلام آباد، لاہور، پشاور، کوئٹہ اور دیگر شہروں میں اربن فلڈنگ کا خدشہ ہے۔
محکمہ موسمیات نے خبردار کیا ہے کہ شدید بارشوں کے باعث اسلام آباد، لاہور، پشاور اور کوئٹہ سمیت دیگر شہروں میں اربن فلڈنگ کا خدشہ ہے، جبکہ خیبر پختونخوا، کشمیر اور گلگت بلتستان میں لینڈ سلائیڈنگ کے واقعات بھی پیش آ سکتے ہیں۔
علاوہ ازیں، ملک کے بالائی علاقوں میں شدید برفباری کے نتیجے میں سڑکیں بند ہونے کا امکان ہے، جس کے باعث مسافروں، سیاحوں اور ماہی گیروں کو محتاط رہنے کی ہدایت کی گئی ہے۔ کسانوں کو بھی فصلوں کے نقصان سے بچاؤ کے لیے پیشگی اقدامات کرنے کی تاکید کی گئی ہے۔
محکمہ موسمیات نے شہریوں کو غیر ضروری سفر سے گریز کرنے اور احتیاطی تدابیر اختیار کرنے کی ہدایت کی ہے تاکہ ممکنہ نقصانات سے بچا جا سکے۔