عظمیٰ بخاری کا پی ٹی آئی پر کڑا وار، سمبڑیال میں شکست کو دھاندلی کہنا شرمناک قرار

لاہور: وزیراطلاعات پنجاب عظمیٰ بخاری نے پی ٹی آئی کی جانب سے سمبڑیال کے ضمنی انتخاب میں دھاندلی کے الزامات کو سختی سے مسترد کرتے ہوئے کہا ہے کہ فافن کی رپورٹ پی ٹی آئی کے تمام دعوؤں کا جواب ہے۔ ان کا کہنا تھا کہ سمبڑیال کے عوام نے پی ٹی آئی کے ریاست مخالف بیانیے کو رد کر دیا۔
عظمیٰ بخاری نے کہا کہ 39 ہزار ووٹوں کی واضح برتری سے شکست کے بعد دھاندلی کا شور مچانا پی ٹی آئی کا پرانا انداز ہے۔ انہوں نے کہا کہ فافن کی رپورٹ میں واضح طور پر کہا گیا ہے کہ پریزائیڈنگ افسران نے فارم 45 پولنگ ایجنٹس کو فراہم کیے اور 121 پولنگ ایجنٹس میں سے 116 نے ووٹنگ کے عمل پر مکمل اعتماد ظاہر کیا۔
ان کا کہنا تھا کہ مسلم لیگ (ن) کا ووٹ 41 فیصد سے بڑھ کر 59 فیصد ہوگیا، جبکہ پی ٹی آئی کا ووٹ 35 فیصد سے کم ہو کر 29 فیصد رہ گیا ہے۔ یہ اعداد و شمار ان لوگوں کے لیے کافی ہیں جو حقیقت کا سامنا کرنے سے گریز کرتے ہیں۔
عظمیٰ بخاری نے کہا کہ شکست تسلیم کرنے کے بجائے پولیس اور انتظامیہ پر الزامات لگانا پی ٹی آئی کا پرانا وطیرہ ہے۔ پنجاب کے عوام اب مریم نواز کے ترقیاتی وژن اور خدمت کی سیاست کو سپورٹ کرتے ہیں، اور یہ نشست ہمیشہ مسلم لیگ (ن) کی رہی ہے اور ناقابل شکست رہی ہے۔