سندھ حکومت نے صوبے کے مختلف اضلاع میں بلدیاتی ضمنی انتخابات کے موقع پر تعطیل کا اعلان کردیا ہے۔
تفصیلات کے مطابق صوبائی حکومت نے 24 ستمبر کو ہونے والے ضمنی انتخابات کے باعث متعلقہ حلقوں میں اسکولوں اور اداروں کی بندش کا نوٹیفکیشن جاری کردیا ہے۔ اس فیصلے کے تحت گھوٹکی، سکھر، خیرپور، میرپور خاص، عمرکوٹ، مٹیاری، حیدرآباد، جامشورو، دادو، بدین اور ٹھٹہ میں تعطیل ہوگی۔
نوٹیفکیشن میں واضح کیا گیا ہے کہ ان اضلاع میں تعلیمی اداروں کو پولنگ اسٹیشنز کے طور پر استعمال کیا جائے گا۔ اسی لیے محکمہ تعلیم سندھ نے ضلعی افسران تعلیم اور ڈائریکٹوریٹ پرائیویٹ اسکولز کو باہمی تعاون کی ہدایت دی ہے تاکہ پولنگ کے عمل میں سہولت فراہم کی جاسکے۔
اس کے علاوہ کراچی کے تین اضلاع، کراچی ویسٹ، کراچی ایسٹ اور کیماڑی میں بھی 24 ستمبر بروز بدھ عام تعطیل کا اعلان کیا گیا ہے، جس کے تحت اسکولوں، سرکاری دفاتر اور دیگر کاروباری ادارے بند رہیں گے۔
