بدین: سندھ کے ضلع کیریو گھنور بدین میں دو گروپوں کے درمیان فائرنگ کے تبادلے میں 6 افراد جاں بحق جبکہ 7 زخمی ہو گئے۔
واقعے کی اطلاع پر وزیراعلیٰ سندھ سید مراد علی شاہ نے نوٹس لیتے ہوئے انسپکٹر جنرل پولیس سے مکمل رپورٹ طلب کرلی ہے۔ وزیراعلیٰ نے ہدایت کی کہ ایسے افسوسناک واقعات کی روک تھام کے لیے مؤثر قانونی اقدامات کیے جائیں اور شہریوں کی جان و مال کے تحفظ کو ہر حال میں یقینی بنایا جائے۔انہوں نے مزید کہا کہ ان مجرمانہ کارروائیوں میں ملوث افراد کو فوری طور پر گرفتار کیا جائے اور ان کے خلاف قانون کے مطابق سخت کارروائی کی جائے۔ وزیراعلیٰ نے اس بات پر افسوس کا اظہار کیا کہ مقدس مہینے میں بھی لوگ ایک دوسرے کا خون بہانے سے باز نہیں آتے۔
وزیر داخلہ سندھ ضیاء الحسن لنجار نے بھی واقعے کا نوٹس لیتے ہوئے ایس ایس پی بدین سے تفصیلات طلب کرلیں۔ انہوں نے ہدایت دی کہ فوری طور پر پولیس ٹیمیں تشکیل دی جائیں اور قتل میں ملوث ملزمان کو جلد از جلد گرفتار کیا جائے۔ وزیر داخلہ نے کہا کہ خوف و ہراس پھیلانے والے عناصر کے خلاف سخت اقدامات کیے جائیں گے۔
انہوں نے مزید کہا کہ علاقے میں امن قائم رکھنے کے لیے معززین اور معروف شخصیات کا کردار بھی یقینی بنایا جائے تاکہ قانون کی حکمرانی برقرار رہے۔
