وزیر اعلیٰ پنجاب گرین ٹریکٹرز پروگرام کے تحت ڈلیوری کا عمل جاری

وزیر اعلیٰ پنجاب گرین ٹریکٹرز پروگرام کے تحت ضلعی سطح پر ڈلیوری کا عمل جاری۔اس سلسلہ میں آج بہاولپور میں ڈائریکٹر زراعت توسیع محمد جمیل غوری نے 21 خوش نصیب کاشتکاروں کو گرین ٹریکٹرز دئیے۔ ڈپٹی ڈائریکٹر زراعت حافظ محمد شفیق اور ڈاکٹر مسعود سلیم بھٹہ بھی ان کے ہمراہ تھے۔ڈائریکٹر زراعت توسیع محمد جمیل غوری کا کہنا تھا کہ بہاولپور ڈویژن میں 1383 گرین ٹریکٹرز دئیے جارہے ہیں جن پر 1 ارب 38 کروڑ 30لاکھ روپے سبسڈی ہے۔جبکہ فی ٹریکٹر 10 لاکھ روپے سبسڈی بنتی ہے۔انہوں نے کہا کہ یہ ملکی تاریخ کا سب سے بڑا پروگرام ہے جس کے تحت قرعہ اندازی میں کامیاب ہونے والے کاشتکاروں میں ضلعی سطح پرگرین ٹریکٹرز کی فراہمی جاری ہے۔ انہوں نے مزید کہا کہ اب تک بہاولپورڈویژن میں 428 کاشتکاروں کو گرین ٹریکٹرز ڈلیور کردئیے گئے ہیں جس میں سے ضلع بہاولپور میں 145 ضلع بہاولنگر میں 146 اور رحیم یارخاں میں 137 ٹریکٹرز دئیے گئے ہیں۔انہوں نے کہا کہ حکومت پنجاب نے وزیر اعلیٰ پنجاب گرین ٹریکٹرز پروگرام کے لئے 30 ارب روپے کی خطیر رقم مختص کی ہے۔وزیر اعلیٰ پنجاب کی طرف سے کاشتکاروں کو گرین ٹریکٹرز کا تحفہ ملا ہے جس کے ذریعے میکاننزڈ فارمنگ کو فروغ حاصل ہوگا۔