پشاور: گورنر خیبرپختونخوا فیصل کریم کنڈی نے کہا ہے کہ وفاق کے ساتھ اب اختلافات نہیں ہوں گے، تمام صوبوں کے ساتھ مل کر چلیں گے اور ایک یونٹ بن کر کام کریں گے۔ انہوں نے صوبے بھر میں صفائی ستھرائی بہتر بنانے اور تجاوزات کے خاتمے کے لیے بلاامتیاز کارروائی کا عزم بھی ظاہر کیا ہے۔
فیصل کریم کنڈی نے کہا کہ صوبے کو صاف ستھرا بنانے کا فیصلہ کر لیا گیا ہے، جس کے تحت صفائی اور تجاوزات کے خلاف آپریشن کا آغاز پشاور سے کیا گیا ہے۔ انہوں نے واضح کیا کہ کارروائی کے دوران کسی کی سفارش قبول نہیں کی جائے گی۔
گندم کے معاملے پر گورنر خیبرپختونخوا کا کہنا تھا کہ اس حوالے سے بھی انکوائری شروع کر دی گئی ہے تاکہ معلوم کیا جا سکے کہ صوبے کے حصے کی گندم کہاں اور کیسے غائب ہوئی۔ انہوں نے کہا کہ معاملے کے حقائق سامنے لائے جائیں گے اور انکوائری رپورٹ جلد جاری کر دی جائے گی۔
انہوں نے مزید کہا کہ آئندہ صرف ایسے ترقیاتی منصوبوں پر کام کیا جائے گا جو عوام کے لیے فائدہ مند ہوں۔ ماضی میں ترقیاتی کاموں کے بل چار چار محکموں کی جانب سے بنائے جانے کی شکایات سامنے آتی رہی ہیں، تاہم اب غیر ضروری اور غیر مفید منصوبوں پر رقم خرچ نہیں کی جائے گی اور سرکاری پیسے کے ضیاع کو روکنے کے لیے اقدامات کیے جائیں گے۔
ٹریفک نظام کی بہتری سے متعلق فیصل کریم کنڈی نے بتایا کہ ٹریفک قوانین کے حوالے سے اجلاس طلب کیا گیا ہے۔ ٹریفک کے نظام کو جدید خطوط پر استوار کرنے کے لیے نئے قوانین متعارف کرائے جائیں گے اور کیمروں کی مدد سے نگرانی کا نظام بہتر بنایا جائے گا۔ ان کا کہنا تھا کہ اس اقدام سے چالان سے متعلق شکایات کے خاتمے میں بھی مدد ملے گی۔
بجلی کی طویل لوڈشیڈنگ پر بات کرتے ہوئے گورنر خیبرپختونخوا نے کہا کہ وہ اس مسئلے کے حل کے لیے واپڈا حکام کے ساتھ بیٹھیں گے۔ بجلی چوری کے حوالے سے انہوں نے کہا کہ اب صارفین کو بجلی کے بل ادا کرنا ہوں گے۔ ان کا کہنا تھا کہ وفاق کی جانب سے زیادتی، لوڈشیڈنگ اور گیس کی بندش سے متعلق شکایات کے بجائے مسائل کے حل کے لیے عملی اقدامات کیے جائیں گے، جبکہ بجلی اور گیس کے معاملات بھی جلد حل کرنے کی کوشش کی جائے گی۔
فیصل کریم کنڈی نے آخر میں کہا کہ خیبرپختونخوا وفاق کے ساتھ مل کر چلے گا اور تمام صوبوں کے ساتھ ہم آہنگی برقرار رکھی جائے گی۔ ان کے مطابق اب اختلافات کے بجائے اتحاد اور مشترکہ حکمت عملی کے تحت آگے بڑھا جائے گا۔
