واشنگٹن: ایران کے ساتھ جاری جنگ اور بڑھتی کشیدگی کے دوران امریکی صدر ڈونلڈ ٹرمپ کی عوامی مقبولیت میں نمایاں کمی سامنے آئی ہے، جو ان کی موجودہ مدتِ صدارت کی کم ترین سطح تک پہنچ گئی ہے۔
رائٹرز/اِپسوس کے تازہ سروے کے مطابق صرف 33 فیصد امریکی شہری ٹرمپ کی بطور صدر کارکردگی سے مطمئن ہیں، جبکہ 64 فیصد نے ان کی کارکردگی کو ناپسند کیا۔
سروے کے نتائج میں ایران کے خلاف جاری امریکی جنگ کے حوالے سے بھی امریکی عوام میں تشویش کا اظہار کیا گیا۔ 80 فیصد شرکا نے رائے دی کہ ایران کے ساتھ تنازع طویل عرصے تک جاری رہنے کا امکان ہے۔ اس رائے میں 87 فیصد ڈیموکریٹس اور 71 فیصد ری پبلکنز بھی شامل ہیں۔
اس کے برعکس صرف 16 فیصد افراد نے توقع ظاہر کی کہ ایران کے ساتھ جاری تنازع آئندہ چند ہفتوں میں اختتام پذیر ہوسکتا ہے۔
رائٹرز کے مطابق یہ سروے چار روز کے دوران آن لائن کیا گیا، جس میں امریکا بھر سے 1,166 بالغ افراد نے شرکت کی۔ سروے کے نتائج میں ممکنہ غلطی کا تناسب تقریباً 3 فیصد بتایا گیا ہے۔
