اسلام آباد: وفاقی وزیر داخلہ محسن نقوی سے برطانوی نائب وزیر خارجہ ہمیش فالکنر نے ملاقات کی جس میں پاکستان اور برطانیہ کے تعلقات، خطے کی صورتحال اور مختلف شعبوں میں تعاون کے فروغ پر تبادلہ خیال کیا گیا۔
اس موقع پر برطانوی نائب وزیر خارجہ نے ایران اور امریکا کے درمیان مفاہمت کے عمل میں پاکستان کے مثبت کردار کو سراہتے ہوئے کہا کہ وزیراعظم شہباز شریف اور فیلڈ مارشل عاصم منیر نے امن کے قیام میں اہم اور تاریخی کردار ادا کیا ہے، جس کے باعث پاکستان کو عالمی سطح پر امن کے علمبردار کے طور پر تسلیم کیا جا رہا ہے۔
ملاقات میں انسداد دہشت گردی، غیر قانونی ہجرت، ادارہ جاتی تعاون، پولیس ٹریننگ اور دیگر شعبوں میں اشتراک بڑھانے پر اتفاق کیا گیا۔ جعلی اسٹوڈنٹ ویزوں کے مسئلے کے حل کے لیے بھی مشترکہ حکمت عملی اپنانے کا فیصلہ کیا گیا۔
محسن نقوی نے کہا کہ پاکستان میں غیر قانونی ہجرت اور انسانی اسمگلنگ کے خلاف کارروائیاں بلا امتیاز جاری ہیں اور اپ اسکیل منصوبے کے مثبت نتائج سامنے آ رہے ہیں۔
انہوں نے مزید کہا کہ افغانستان سے متعدد دہشت گرد تنظیمیں سرگرم ہیں، اس لیے افغان حکومت کو اپنی سرزمین پاکستان کے خلاف استعمال ہونے سے روکنا ہوگا۔
ملاقات میں دونوں ممالک کے اعلیٰ حکام اور نمائندے بھی شریک تھے۔
