امریکی صدر ڈونلڈ ٹرمپ نے ایران پر زور دیا ہے کہ وہ اسرائیل پر حملے فوری طور پر روک دے اور مذاکرات کے عمل میں دوبارہ شامل ہو کر معاہدے کی جانب پیش رفت کرے۔
غیر ملکی میڈیا رپورٹس کے مطابق فاکس نیوز کو دیے گئے انٹرویو میں ٹرمپ نے کہا کہ ایران کی جانب سے میزائل حملوں کے بعد صورتحال مزید کشیدہ ہو گئی ہے، لہٰذا اب وقت ہے کہ حملے بند کیے جائیں اور بات چیت دوبارہ شروع کی جائے۔
انہوں نے دعویٰ کیا کہ ایران اور امریکہ کے درمیان جاری مذاکرات ایک اہم مرحلے میں داخل ہو رہے ہیں اور ممکن ہے کہ آئندہ چند دنوں میں کسی معاہدے کی سمت پیش رفت دیکھنے میں آئے۔
رپورٹس کے مطابق ایران نے اسرائیل پر میزائل حملوں کو خطے میں جاری کشیدگی اور مبینہ جنگ بندی خلاف ورزیوں کا ردعمل قرار دیا ہے، جبکہ صورتحال کے جواب میں اسرائیل نے بھی کارروائی کی۔
دوسری جانب ایران کی جانب سے شمالی اسرائیل پر درجنوں بیلسٹک میزائل فائر کیے جانے کی اطلاعات بھی سامنے آئی ہیں، جس کے بعد خطے میں تناؤ مزید بڑھ گیا ہے۔
