پنجاب حکومت نے راشن کارڈ پروگرام کے تحت ایک اہم سنگ میل عبور کرتے ہوئے 12 لاکھ رجسٹرڈ ورکرز کے بینک اکاؤنٹس کھول دیے ہیں جبکہ ان اکاؤنٹس میں مجموعی طور پر 22 ارب روپے بھی منتقل کر دیے گئے ہیں۔
صوبائی وزیر محنت و انسانی وسائل پنجاب محمد منشاء اللہ بٹ کے مطابق پورے صوبے میں اکاؤنٹس کھولنے کا عمل انتہائی مختصر وقت میں مکمل کیا گیا ہے اور محکمہ سوشل سکیورٹی نے یہ ٹاسک کامیابی سے انجام دیا ہے۔
انہوں نے بتایا کہ راشن کارڈ کے ذریعے محنت کشوں کو مالی معاونت کی فراہمی کا سلسلہ جاری ہے اور وزیراعلیٰ پنجاب کے ویژن کے مطابق ہر ماہ 3 ہزار روپے کی سبسڈی براہ راست ورکرز کے اکاؤنٹس میں منتقل کی جا رہی ہے۔
ان کا کہنا تھا کہ حکومت پنجاب محنت کش طبقے کی فلاح و بہبود کے لیے مسلسل اقدامات کر رہی ہے اور ورکرز کو ریلیف فراہم کرنا موجودہ حکومت کی اولین ترجیح ہے۔
