امریکی صدر ڈونلڈ ٹرمپ نے کہا ہے کہ قطر پر حملے کا فیصلہ ان کا نہیں بلکہ اسرائیلی وزیراعظم بنیامین نیتن یاہو کا تھا۔
غیر ملکی میڈیا کے مطابق ٹرمپ نے بیان میں کہا کہ قطر پر یکطرفہ فضائی حملہ نہ امریکا کے مفاد میں ہے اور نہ ہی اسرائیل کے مقاصد کے لیے مفید۔ انہوں نے واضح کیا کہ امریکا نے کبھی اس فیصلے کی حمایت نہیں کی۔
ٹرمپ نے مزید کہا کہ انہوں نے امریکی وزیر خارجہ مارکو روبیو کو ہدایت دی ہے کہ قطر کے ساتھ دفاعی تعاون کے معاہدے کو حتمی شکل دی جائے۔
صدر ٹرمپ نے کہا کہ “قطر ایک خودمختار ملک اور امریکا کا قریبی اتحادی ہے، جو ہمارے ساتھ مل کر امن قائم کرنے کی کوشش کر رہا ہے۔”
وائٹ ہاؤس نے دعویٰ کیا تھا کہ امریکا نے قطری حکام کو اسرائیلی حملے سے پہلے اطلاع دی تھی، تاہم قطر نے اس دعوے کی سختی سے تردید کی۔
قطری وزارتِ خارجہ کے ترجمان ماجد الانصاری نے کہا کہ “قطر کو کسی حملے کی پیشگی اطلاع نہیں دی گئی، امریکی حکام کی کال دھماکوں کے بعد موصول ہوئی۔”
