امریکا اور بھارت کے درمیان تجارتی تناؤ ایک بار پھر سرخیوں میں ہے، جب امریکی صدر ڈونلڈ ٹرمپ کی جانب سے بھارت پر اضافی ٹیرف عائد کرنے کا عندیہ دیا گیا، تو بھارتی میڈیا شدید ردعمل دیتے ہوئے سخت بوکھلاہٹ کا شکار نظر آیا۔
رپورٹس کے مطابق، بھارت میں مودی حکومت کے حمایتی میڈیا ہاؤسز نے امریکی صدر پر تنقید کے نشتر برسا دیے، اور ان کے حالیہ بیان کو بھارت دشمنی قرار دیتے ہوئے کہا کہ ڈونلڈ ٹرمپ خود پسندی اور ذہنی عدم توازن کا شکار ہیں۔
بھارتی میڈیا کا کہنا ہے کہ صدر ٹرمپ کی پالیسیاں غیر مستحکم اور بھارت مخالف ہیں، جب کہ ان کے معاشی فیصلے بھارت کی اقتصادی ساکھ کو نقصان پہنچا رہے ہیں۔
مودی حکومت کی جانب سے عالمی سطح پر ’معاشی طاقت‘ بننے کے دعووں کو امریکی ٹیرف وار نے جھوٹا ثابت کر دیا۔ بھارتی میڈیا نے ٹرمپ کو نااہل، خود پسند اور ذہنی مریض جیسے الفاظ سے نشانہ بنانا شروع کر دیا ہے۔
ماہرین کے مطابق، بھارت کی تجارتی حکمت عملی اور سفارتی پالیسیوں کی ناکامی نے موجودہ بحران کو جنم دیا، اور اب گودی میڈیا عوام کی توجہ ہٹانے کے لیے الزام تراشی کی سیاست پر اتر آیا ہے۔
