لاہور میں پولیس نے ایک اہم کارروائی کے دوران نجی یونیورسٹی کی طالبہ کو شادی کا جھانسہ دے کر دو سال تک جنسی استحصال کا نشانہ بنانے والے ملزم کو گرفتار کر لیا ہے۔
پولیس کے مطابق، اعلیٰ حکام کی جانب سے واقعے کا سختی سے نوٹس لیتے ہوئے فوری گرفتاری کی ہدایت دی گئی، جس پر قلعہ گجر سنگھ پولیس نے بروقت کارروائی کرتے ہوئے ملزم بابر کو حراست میں لے لیا۔
تحقیقات سے معلوم ہوا ہے کہ بابر کی متاثرہ لڑکی سے سوشل میڈیا پر دوستی ہوئی تھی، جس کے بعد وہ شادی کا جھانسہ دے کر اسے دو سال تک زیادتی کا نشانہ بناتا رہا۔ اس دوران وہ لڑکی کو قتل کی دھمکیاں دیتا رہا اور تشدد بھی کرتا رہا۔
ملزم کو ابتدائی پوچھ گچھ کے بعد مزید تفتیش کے لیے جینڈر سیل کے حوالے کر دیا گیا ہے۔
پولیس حکام کا کہنا ہے کہ خواتین اور بچوں کے ساتھ زیادتی کے واقعات میں ملوث مجرم کسی بھی رعایت کے مستحق نہیں اور قانون کے مطابق سخت کارروائی عمل میں لائی جائے گی۔
