ملتان( کرائم سیل)گلگشت پولیس کا جادو، 60 لاکھ روپے کی 400و لایتی شراب کی برآمدگی جائے وقوعہ سےتھانے پہنچتے اور مقدمہ درج ہونے تک کم ہوتی ہوتی100 بوتل رہ گئی۔ آخر کار پولیس کو مجبوراً صرف 100بوتلوںکی برآمدگی کا ہی مقدمہ درج کرنا پڑا ۔بتایا گیا ہے کہ اس ولایتی شراب کی مارکیٹ میں فی بوتل قیمت 18 ہزار روپے ہے۔ یہ شراب کانسٹیبل سیف اللہ کی مخبری پر برآمد ہوئی تھی۔ پولیس نے دو ملزمان کو گرفتار کیا، چھ دن حراست میں رکھا۔ شراب کی بوتلوں کی تعداد اس دوران تبدیل ہوتی رہی بالاخر گرفتار ملزمان کاشف خان اور حمزہ میں سے مرکزی ملزم کاشف خان کو مبینہ طور پر 400 بوتل شراب کی برآمدگی پر خاموشی اختیار کرنے اور دو لاکھ روپے خرچہ تھانہ دینے پر رہا کر دیا گیا اور مقدمہ ملزم حمزہ پر درج کر دیا گیا ۔بتایا گیا ہے کہ یہ شراب تھانہ صدر کی حدود میں چونگی نمبر ایک سے متعلقہ تھانے کے نوٹس میں لائے بغیر پکڑی گئی ۔ملزمان کاشف اور حمزہ ایک گاڑی میں گاہکوں کو گزشتہ کئی سال سے سپلائی دے رہے تھے اور ان کے گاہکوں میں اہم شخصیات اور کچھ با اثر افسران بھی شامل تھے۔
