امریکی صدر ڈونلڈ ٹرمپ نے انکشاف کیا ہے کہ انہوں نے اسرائیلی وزیراعظم بنیامین نیتن یاہو کو ایران کے معاملے پر سخت پیغام دیتے ہوئے خبردار کیا تھا کہ اگر کشیدگی میں اضافہ کیا گیا تو اسرائیل ممکنہ طور پر خود کو تنہا پا سکتا ہے۔
اسرائیلی میڈیا سے گفتگو میں ٹرمپ نے بتایا کہ انہوں نے حالیہ دنوں میں نیتن یاہو سے ٹیلیفونک رابطہ کیا اور انہیں مشورہ دیا کہ ایران کے بیلسٹک میزائل حملوں کے جواب میں فوری فوجی کارروائی سے گریز کیا جائے۔
انہوں نے دعویٰ کیا کہ امریکا کو اسرائیل کی جانب سے ایران پر کیے گئے حملوں کے بارے میں آخری مراحل میں اطلاع دی گئی، جب میزائل پہلے ہی روانہ کیے جا چکے تھے۔
ٹرمپ کے مطابق ابتدا میں یہ تاثر دیا گیا تھا کہ اسرائیل کچھ دنوں کے لیے کارروائی مؤخر کرنے پر آمادہ ہے تاکہ امریکا اور ایران کے درمیان جاری سفارتی کوششوں کو آگے بڑھایا جا سکے، تاہم بعد میں صورتحال تبدیل ہو گئی۔
رپورٹس کے مطابق اسرائیلی وزیراعظم نے سکیورٹی حکام سے مشاورت کے بعد امریکی وزیر خارجہ کو اپنے فیصلے سے آگاہ کیا تھا۔
امریکی صدر نے یہ بھی کہا کہ انہوں نے اسرائیلی کارروائی کے دائرہ کار کو محدود کرنے کی کوشش کی جبکہ کئی علاقائی ممالک نے بھی امریکا سے اپیل کی کہ کشیدگی کم کرنے کے لیے کردار ادا کیا جائے۔
ٹرمپ نے دعویٰ کیا کہ ایرانی حکام نے بھی پیغام دیا ہے کہ وہ مزید تصادم نہیں چاہتے اور سفارتی حل کے لیے آمادہ ہیں، جس کے بعد انہوں نے نیتن یاہو سے دوبارہ رابطہ کر کے تحمل کا مشورہ دیا۔
انہوں نے امید ظاہر کی کہ ایران اور امریکا کے درمیان معاہدے کی گنجائش اب بھی موجود ہے اور سفارتی پیش رفت ممکن ہے۔
