لاہور کے علاقے چوہنگ میں خاتون سے اجتماعی زیادتی کی شکایت پر پولیس نے فوری کارروائی کرتے ہوئے دو گھنٹے کے اندر تین ملزمان کو گرفتار کر لیا، جبکہ چوتھے ملزم کی گرفتاری کے لیے چھاپے مارے جا رہے ہیں۔ ڈی آئی جی آپریشنز فیصل کامران خود مقدمے کی نگرانی کر رہے ہیں۔ پولیس کے مطابق تھانہ چوہنگ میں مقدمہ نمبر 2029/25 دفعہ 375 اے کے تحت درج کیا گیا ہے۔ گرفتار ملزمان میں وسیم اکرم، شہزاد اور عدنان شامل ہیں، جبکہ چوتھا ملزم ارشد تاحال مفرور ہے۔ تحقیقات سے معلوم ہوا کہ ملزم وسیم اکرم نے متاثرہ خاتون کو ساہیوال سے بلایا اور اپنے رشتہ داروں کے گھر ٹھہرایا، جہاں ملزمان نے دو دن تک زیادتی کا نشانہ بنایا۔ متاثرہ خاتون کو مکمل قانونی اور طبی امداد فراہم کی جا رہی ہے۔ ڈی آئی جی فیصل کامران نے کہا کہ گھناؤنے جرم میں ملوث ملزمان کو کیفر کردار تک پہنچایا جائے گا، ایسے مجرم کسی رعایت کے مستحق نہیں۔
