اقوام متحدہ کے سیکریٹری جنرل انتونیو گوٹریس نے خبردار کیا ہے کہ آبنائے ہرمز میں جہازوں کی محفوظ آمد و رفت میں رکاوٹ عالمی معیشت پر سنگین اثرات ڈال رہی ہے۔
انہوں نے کہا کہ اس اہم سمندری گزرگاہ میں پیدا ہونے والی صورتحال توانائی، ٹرانسپورٹ، صنعت اور خوراک کی عالمی منڈیوں کو منفی طور پر متاثر کر رہی ہے۔
سوشل میڈیا پر جاری اپنے بیان میں انتونیو گوٹریس نے کہا کہ مشرق وسطیٰ میں بڑھتی ہوئی کشیدگی کے اثرات وقت کے ساتھ مزید شدت اختیار کر رہے ہیں۔
ان کے مطابق آبنائے ہرمز جیسے اہم راستے میں خلل عالمی سپلائی چین کو متاثر کر رہا ہے، جس کے نتیجے میں عالمی معیشت شدید دباؤ کا شکار ہے۔
انہوں نے عالمی برادری سے اپیل کی کہ فوری طور پر مذاکرات کا راستہ اپنایا جائے اور ایسے حل تلاش کیے جائیں جو خطے کو مزید بحران سے بچا سکیں۔
انتونیو گوٹریس نے کہا کہ موجودہ صورتحال نہ صرف خطے بلکہ پوری دنیا کے لیے خطرناک ثابت ہو سکتی ہے۔
