اداکار منیب بٹ کے خلاف اغوا برائے تاوان کیس کی سماعت، عدالت نے عبوری ضمانت میں توسیع کر دی
اداکار منیب بٹ انسداد دہشت گردی کی خصوصی عدالت میں اغوا برائے تاوان کے مقدمے کی سماعت کے دوران پیش ہوئے جہاں عدالت نے ان کی عبوری ضمانت میں توسیع کرتے ہوئے آئندہ سماعت تک حفاظتی ریلیف برقرار رکھا۔
تفصیلات کے مطابق ایئرپورٹ پولیس کی جانب سے درج کیے گئے مقدمے میں منیب بٹ کو نامزد کیا گیا ہے۔ مقدمہ 23 اپریل کو متعال خان کی مدعیت میں درج ہوا تھا جس میں الزام ہے کہ ملزم نے دیگر افراد کے ساتھ مل کر مدعی کو مبینہ طور پر اغوا کیا۔
پولیس کے مطابق مقدمے میں یہ بھی مؤقف اختیار کیا گیا ہے کہ مبینہ طور پر ملزمان نے مغوی کے اکاؤنٹ سے لاکھوں روپے مالیت کی کرپٹو کرنسی منتقل کی۔
تحقیقات میں مزید بتایا گیا ہے کہ کرپٹو کرنسی کی منتقلی کے بعد متاثرہ شخص کو کورنگی کے علاقے میں چھوڑ دیا گیا۔
عدالتی کارروائی کے دوران منیب بٹ کی جانب سے عبوری ضمانت میں توسیع کی درخواست دائر کی گئی جسے منظور کرتے ہوئے عدالت نے ریلیف میں توسیع کر دی۔
یاد رہے کہ کیس ابتدائی مرحلے میں ہے اور پولیس کی تفتیش جاری ہے جبکہ عدالت نے آئندہ سماعت پر پیش رفت رپورٹ طلب کر لی ہے۔
