حیدرآباد کے علاقے بھلن کالونی میں گھریلو ناچاقی کے باعث ایک افسوسناک واقعہ پیش آیا، جہاں ایک خاتون نے اپنے شوہر کو بے دردی سے قتل کر دیا۔ واردات کا انکشاف مقتول کے 4 سالہ بیٹے نے کیا، جس نے پولیس کو حقیقت سے آگاہ کیا۔ ایس ایس پی عدیل چانڈیو کے مطابق، ملزمہ قتل کے بعد شوہر کی ہلاکت کو دو نامعلوم افراد سے جھگڑے کا نتیجہ قرار دینے کی کوشش کر رہی تھی۔ تاہم، کمسن بچے کے بیان نے اصل حقیقت کو بے نقاب کر دیا۔ تحقیقات کے دوران ملزمہ نے اعتراف جرم کرتے ہوئے بتایا کہ اس نے گھریلو جھگڑے کے بعد اپنے شوہر شمن کو لوہے کی راڈ اور ڈنڈے کے وار سے موت کے گھاٹ اتار دیا۔ پولیس نے موقع سے آلہ قتل بھی برآمد کر لیا ہے اور قانونی کارروائی جاری ہے۔
