کراچی: اولمپک ریکارڈ ہولڈر اور گولڈ میڈلسٹ ارشد ندیم نے 35 ویں نیشنل گیمز میں جیولن تھرو ایونٹ جیت کر گولڈ میڈل اپنے نام کر لیا۔
پاکستان واپڈا کی نمائندگی کرنے والے ارشد ندیم نے 81.81 میٹر دور نیزہ پھینک کر دیگر کھلاڑیوں پر واضح برتری حاصل کی۔
ارشد ندیم کے قریبی حریف یاسر سلطان، جو اسلامی یکجہتی گیمز میں سلور میڈل حاصل کر چکے ہیں، نے 70.77 میٹر کی تھرو کے ساتھ سلور میڈل جیتا، یاسر سلطان بھی پاکستان واپڈا کی نمائندگی کر رہے ہیں۔
پاکستان آرمی کے محمد ابرار نے 68.67 میٹر دور نیزہ پھینک کر برانز میڈل حاصل کیا۔
ارشد ندیم نے گولڈ میڈل جیت کر اپنے اعزاز کا کامیاب دفاع کیا۔ انہوں نے گزشتہ سال کوئٹہ میں 34 ویں نیشنل گیمز میں 78.01 میٹر دور نیزہ پھینک کر پہلی پوزیشن حاصل کی تھی۔
ارشد ندیم پہلے ہی اگلے لاس اینجلس اولمپکس 2028 کے لیے کوالیفائی کر چکے ہیں۔ جیولن تھرو کے پہلے مرحلے میں 16 ایتھلیٹ شریک ہوئے، جن میں سے 8 نے دوسرے مرحلے میں جگہ بنائی۔
ارشد ندیم کی تھرو کی تفصیلات: پہلی تھرو میں 78.4 میٹر، دوسری میں 77.77 میٹر، اور تیسری تھرو میں 81.81 میٹر۔
