غزہ پر اسرائیلی حملے مزید شدت اختیار کر گئے، درجنوں فلسطینی شہید

غزہ میں اسرائیلی فورسز کی جانب سے فضائی اور زمینی حملوں میں اضافہ دیکھنے میں آ رہا ہے، جن کے نتیجے میں انسانی جانوں کا بھاری نقصان ہو رہا ہے۔
فلسطینی وزارتِ صحت کے مطابق، صرف آج صبح سے لے کر اب تک کم از کم 64 فلسطینی شہید ہو چکے ہیں، جن میں متعدد بچے اور وہ افراد شامل ہیں جو امدادی سامان کے حصول کی کوشش کر رہے تھے۔
میڈیکل ذرائع کا کہنا ہے کہ جنوبی غزہ میں اسرائیلی افواج نے ان افراد کو نشانہ بنایا جو جی ایچ ایف کے امدادی مرکز کے قریب خوراک حاصل کرنے کے لیے جمع تھے۔ اس سے قبل بھی مختلف مقامات پر ایسے کئی نہتے شہریوں کو نشانہ بنایا گیا ہے جو صرف امداد کے انتظار میں تھے۔
وزارت صحت کا کہنا ہے کہ اسرائیلی کارروائیاں اکتوبر 2023 سے اب تک مسلسل جاری ہیں، جن میں اب تک 62,686 فلسطینی جان کی بازی ہار چکے ہیں، جبکہ 157,951 افراد زخمی ہو چکے ہیں۔ صرف مئی 2025 سے لے کر اب تک، امداد کے متلاشی 2,095 شہری شہید اور 15,431 زخمی ہو چکے ہیں۔