فیلڈ مارشل اور چیف آف آرمی اسٹاف جنرل سید عاصم منیر، نشانِ امتیاز (ملٹری) و ہلالِ جرأت، نے بلوچستان کے علاقے تربت کا دورہ کیا۔ اس دورے کا مقصد سکیورٹی کی موجودہ صورتحال کا جائزہ لینا، جاری ترقیاتی منصوبوں کا معائنہ کرنا اور بلوچستان کی ترقی و استحکام کے لیے عسکری و سول اداروں کے درمیان تعاون کو مزید مضبوط بنانا تھا۔
اس موقع پر وزیراعلیٰ بلوچستان، چیف سیکرٹری اور دیگر اعلیٰ حکام بھی موجود تھے۔ فیلڈ مارشل عاصم منیر کو سکیورٹی امور، فتنۃ الہند کے خلاف کامیاب آپریشنز، جاری ترقیاتی اسکیموں اور جنوبی بلوچستان میں سماجی و اقتصادی بہتری کے لیے کی جانے والی کوششوں پر تفصیلی بریفنگ دی گئی۔
فوجی جوانوں سے خطاب کرتے ہوئے چیف آف آرمی اسٹاف نے ان کی پیشہ ورانہ تیاری، حوصلے اور ملکی خودمختاری کے دفاع کے لیے ان کے پختہ عزم کو سراہا۔ انہوں نے مشکل حالات میں امن و امان قائم رکھنے پر ان کی خدمات کو سراہا۔
تربت آمد پر فیلڈ مارشل سید عاصم منیر کا استقبال کور کمانڈر بلوچستان نے کیا۔
