دریائے چناب اور ستلج میں سیلاب کا خدشہ، پی ڈی ایم اے نے ہائی الرٹ جاری کر دیا

پنجاب میں مون سون بارشوں کے باعث دریائے چناب اور ستلج میں پانی کی سطح خطرناک حد تک بڑھ گئی ہے۔
پنجاب ڈیزاسٹر مینجمنٹ اتھارٹی (پی ڈی ایم اے) نے دریائے چناب کے مرالہ، خانکی اور قادرآباد کے مقامات پر درمیانے سے بلند درجے کے سیلاب کا خدشہ ظاہر کرتے ہوئے ضلعی انتظامیہ اور متعلقہ اداروں کو ہائی الرٹ کر دیا ہے۔
پی ڈی ایم اے کے مطابق گجرانوالہ، سرگودھا، فیصل آباد اور ملتان ڈویژنز کے کمشنرز کو الرٹ جاری کیا گیا ہے، جبکہ نارووال، سیالکوٹ، گجرات، منڈی بہاوالدین، حافظ آباد، وزیرآباد، سرگودھا، خوشاب، جھنگ، چنیوٹ، خانیوال، کوٹ ادو، مظفرگڑھ اور ملتان سمیت 15 اضلاع کے ڈپٹی کمشنرز کو فوری حفاظتی اقدامات کرنے کی ہدایت دی گئی ہے۔
ریلیف کمشنر پنجاب نبیل جاوید نے لوکل گورنمنٹ، زراعت، آبپاشی، صحت، جنگلات، لائیو اسٹاک اور ٹرانسپورٹ سمیت تمام متعلقہ محکموں کو ہدایت دی ہے کہ وزیر اعلیٰ پنجاب کی ہدایات کے مطابق تمام انتظامات پیشگی مکمل کر لیے جائیں۔
ریسکیو 1122 کی ڈیزاسٹر رسپانس ٹیمیں ہائی الرٹ پر ہیں اور ایمرجنسی کنٹرول رومز میں 24 گھنٹے عملے کی موجودگی یقینی بنائی گئی ہے۔
پی ڈی ایم اے کے ڈائریکٹر جنرل نے عوام کو خبردار کیا ہے کہ دریا، ندی، نالوں اور تالابوں میں نہانے سے اجتناب کریں اور کسی بھی خطرناک صورتحال میں فوری طور پر انخلاء کے لیے انتظامیہ کے ساتھ تعاون کریں۔
فلڈ فورکاسٹنگ ڈویژن کے مطابق گنڈا سنگھ والا پر دریائے ستلج میں پانی کا بہاؤ 44,587 کیوسک سے بڑھ کر 50,508 کیوسک تک پہنچ گیا ہے، جہاں اس وقت نیچلے درجے کا سیلاب ریکارڈ کیا گیا ہے، تاہم آئندہ چند گھنٹوں میں صورتحال مزید بگڑ سکتی ہے۔
پی ڈی ایم اے نے شہریوں سے اپیل کی ہے کہ وہ سرکاری ہدایات پر عمل کریں، محفوظ مقامات پر منتقل ہوں، اور ہنگامی صورتحال میں ہیلپ لائن 1129 پر رابطہ کریں۔