کراچی: آسٹریلیا نے ٹی 20 کرکٹ میں لگاتار 9 کامیابیاں حاصل کرکے نیا ریکارڈ بنا لیا ہے۔
ڈارون میں کھیلے گئے سیریز کے پہلے ٹی 20 میچ میں جنوبی افریقہ نے ٹاس جیت کر بولنگ کا فیصلہ کیا۔ آسٹریلیا نے پہلے بیٹنگ کرتے ہوئے مقررہ 20 اوورز میں 178 رنز بنائے اور اپنی تمام وکٹیں گنوا دیں۔
آسٹریلیا کی ابتدائی بیٹنگ لائن ناکام رہی، مچل مارش صرف 13 رنز بنا سکے، جبکہ ٹریوس ہیڈ 2 اور جوش انگلس بغیر کوئی رن بنائے آؤٹ ہوگئے۔ چوتھے نمبر پر آنے والے کیمرون گرین نے 35 رنز بنائے اور ٹم ڈیوڈ نے بھی اچھی بیٹنگ کرتے ہوئے 83 رنز کی شاندار اننگز کھیلی۔ دونوں کے درمیان چوتھی وکٹ کے لیے 40 رنز کی شراکت قائم ہوئی۔
آسٹریلیا نے 75 رنز پر 6 وکٹیں گنوائیں، مگر ٹم ڈیوڈ اور بین دوارشس نے مل کر 59 رنز کی اہم شراکت داری کی جس سے ٹیم نے قابلِ ذکر مجموعہ بنایا۔
جنوبی افریقہ کی فیلڈنگ میں کوتاہی رہی اور انہوں نے چار آسان کیچ چھوڑ دیے، جن میں ایک کیچ ٹم ڈیوڈ نے چھوڑا۔ نوجوان بولر کیوانا مفاکھا نے چار وکٹیں حاصل کیں اور نیا ریکارڈ قائم کیا، لیکن ٹیم کو فتح نہ دلا سکے۔
ہدف کے تعاقب میں جنوبی افریقہ کے رِکلٹن نے 71 رنز بنائے اور ٹرسٹن اسٹبز کے ساتھ 72 رنز کی شراکت قائم کی۔ تاہم جوش ہیزل ووڈ اور ایڈم زیمپا کی شاندار بولنگ نے میچ کا رخ بدلا۔ ہیزل ووڈ اور بین دوارشس نے تین، تین وکٹیں حاصل کیں۔ آخری اوور میں گلین میکسویل نے ایک زبردست کیچ لے کر جنوبی افریقہ کی جیت کی امیدوں کو ختم کر دیا۔
