ملتان: وزیراعلیٰ پنجاب مریم نواز نے مظفر گڑھ میں گونگی بہری لڑکی کے ساتھ ہونے والے افسوسناک زیادتی کے واقعے کا فوری نوٹس لے لیا ہے۔
میڈیا نیوز کے مطابق، وزیراعلیٰ پنجاب کی ہدایت پر حنا پرویز بٹ نے مظفر گڑھ کے ڈی پی او سے واقعے کی تفصیلی رپورٹ طلب کر لی ہے۔
حنا پرویز بٹ نے کہا کہ معذور لڑکی کے ساتھ زیادتی کرنے والا انسان نہیں بلکہ درندہ ہے، ایسے جرائم پیشہ عناصر کو سخت سزا دے کر عبرت کا نشان بنایا جائے گا۔ پولیس نے فوری کارروائی کرتے ہوئے دفعہ 376 (iii) کے تحت مقدمہ درج کیا اور ملزم کو 24 گھنٹوں کے اندر گرفتار کر لیا۔
انہوں نے مزید کہا کہ خواتین کے تحفظ کے حوالے سے کسی قسم کا کوئی سمجھوتہ نہیں کیا جائے گا۔ متاثرہ لڑکی کو قانونی، طبی اور نفسیاتی سہولیات فراہم کی جائیں گی اور کیس کی شفاف اور فوری کارروائی کو یقینی بنایا جائے گا۔
