لاہور: یومِ استحصالِ کشمیر کے موقع پر پاکستان تحریک انصاف کی جانب سے آج پورے ملک میں احتجاجی مظاہروں کا اعلان کیا گیا ہے، جس کے تحت پنجاب بھر میں ریلیوں اور اجتماعات کا انعقاد کیا جائے گا۔
پارٹی ذرائع کے مطابق 5 اگست کو یومِ سیاہ کے طور پر مناتے ہوئے تمام انتخابی حلقوں میں مظاہرے کیے جائیں گے، اور اس سلسلے میں اراکین اسمبلی، ٹکٹ یافتہ امیدواروں اور تنظیمی قیادت کو بھرپور شرکت یقینی بنانے کی ہدایت کی گئی ہے۔
لاہور میں بھی مختلف علاقوں میں احتجاج کی تیاری مکمل کر لی گئی ہے۔ پی ٹی آئی لاہور کے صدر امتیاز شیخ کے مطابق شہر کے کئی حصوں میں ریلیاں نکالی جائیں گی، جبکہ مرکزی سطح پر ایک بڑا اجتماع منعقد کرنے کی بھی کوشش کی جائے گی، تاہم سیکیورٹی صورتحال کو مدنظر رکھتے ہوئے متبادل حکمت عملی بھی تیار کر لی گئی ہے۔
دوسری جانب پی ٹی آئی کا دعویٰ ہے کہ مظاہروں کو ناکام بنانے کے لیے پولیس نے لاہور سے 300 سے زائد کارکنوں کو گرفتار کر لیا ہے، جب کہ متعدد رہنماؤں کے گھروں پر چھاپے بھی مارے گئے ہیں۔
پولیس ذرائع کا کہنا ہے کہ امن عامہ کو برقرار رکھنے کے لیے لاہور سمیت صوبہ بھر میں اینٹی رائٹ فورس کی نفری تعینات کر دی گئی ہے، جب کہ حساس سرکاری عمارتوں اور اہم شاہراہوں پر سیکیورٹی سخت کر دی گئی ہے۔
پارٹی ذرائع کے مطابق اگر مرکزی سطح پر مظاہرہ ممکن نہ ہو سکا تو ہر حلقے میں الگ الگ احتجاج کا سلسلہ جاری رکھا جائے گا۔
