پنجاب میں طوفانی بارشوں کا الرٹ، سیلاب اور لینڈ سلائیڈنگ کا خدشہ

پنجاب میں شدید بارشوں کی نئی لہر کا خدشہ ظاہر کر دیا گیا ہے، جس کے پیش نظر ممکنہ سیلاب اور لینڈ سلائیڈنگ کے خطرات کے باعث الرٹ جاری کر دیا گیا ہے۔
محکمہ موسمیات کے مطابق اس وقت لاہور میں مون سون کا کمزور سسٹم موجود ہے، جس کے باعث بارشوں کی شدت میں وقتی کمی آئی ہے، تاہم موسم گرم اور مرطوب ہوتا جا رہا ہے۔ لاہور میں آج کم سے کم درجہ حرارت 27 ڈگری سینٹی گریڈ جبکہ زیادہ سے زیادہ 35 ڈگری تک جانے کا امکان ہے۔
دوسری جانب پی ڈی ایم اے نے 4 سے 7 اگست کے دوران دوبارہ شدید بارشوں کی پیشگوئی پر الرٹ جاری کرتے ہوئے خبردار کیا ہے کہ پنجاب کے کئی اضلاع میں موسلا دھار بارشیں متوقع ہیں، خاص طور پر دریاؤں کے بالائی علاقوں میں گرج چمک کے ساتھ شدید بارشوں کا امکان ہے۔
پی ڈی ایم اے کا کہنا ہے کہ 5 اگست سے شروع ہونے والی بارشوں کے نتیجے میں دریائے چناب اور جہلم میں درمیانے سے بلند درجے کے سیلاب کا خطرہ موجود ہے۔ ادارے نے صوبائی کنٹرول روم اور تمام ضلعی ایمرجنسی مراکز کو ہائی الرٹ کر دیا ہے۔
متاثر ہونے والے ممکنہ اضلاع میں راولپنڈی، فیصل آباد، گجرانوالہ، سرگودھا، ملتان، ساہیوال، بہاولپور، جہلم، اٹک، چکوال، مری، گلیات، میانوالی، نارووال، گجرات، سیالکوٹ، ٹوبہ ٹیک سنگھ، منڈی بہاالدین اور ڈی جی خان شامل ہیں۔
پی ڈی ایم اے نے خبردار کیا ہے کہ نشیبی علاقوں میں ندی نالوں میں طغیانی اور مری جیسے پہاڑی علاقوں میں لینڈ سلائیڈنگ کا خطرہ موجود ہے۔ شہریوں، سیاحوں اور مسافروں کو غیر ضروری سفر سے گریز اور احتیاطی تدابیر اختیار کرنے کا مشورہ دیا گیا ہے۔
ڈی جی پی ڈی ایم اے عرفان علی کاٹھیا نے تمام ضلعی انتظامیہ کو ہدایت کی ہے کہ عملہ اور مشینری کو مکمل الرٹ رکھا جائے، واسا اور میونسپل ادارے نشیبی علاقوں میں نکاسی آب یقینی بنائیں، اور متعلقہ افسران بارش کے دوران فیلڈ میں موجود رہ کر حالات کی نگرانی کریں۔