لاہور: وزیراعلیٰ پنجاب مریم نواز نے بارڈر ملٹری پولیس میں شامل ہونے والی 53 باہمت خواتین کو زبردست خراجِ تحسین پیش کیا ہے۔
سماجی رابطوں کی ویب سائٹ “ایکس” (سابقہ ٹوئٹر) پر جاری اپنے پیغام میں مریم نواز نے کہا کہ ڈی جی خان اور راجن پور جیسے علاقوں میں، جہاں ماضی میں خواتین کا نام لینا بھی دشوار تھا، آج وہاں کی بیٹیاں بہادری اور عزت کے ساتھ اپنے فرائض ادا کرنے کے لیے وردی پہن چکی ہیں۔
انہوں نے کہا کہ بارڈر ملٹری پولیس میں ان خواتین کی شمولیت ایک تاریخی لمحہ ہے، اور یہ اس بات کی دلیل ہے کہ معاشرہ تبدیلی کی جانب گامزن ہے۔
مریم نواز نے مزید کہا کہ یہ بیٹیاں روایتی پابندیوں کو پیچھے چھوڑ کر، حوصلے اور عزم کے ساتھ آگے بڑھ رہی ہیں۔ ان خواتین کی شجاعت پر فخر ہے جو اب ملک کی سرحدوں کی محافظ بن چکی ہیں۔