آج مادرِ وطن کے پہلے نشانِ حیدر کیپٹن محمد سرور شہید کا 77واں یومِ شہادت پورے قومی وقار، فخر اور عقیدت سے منایا جا رہا ہے۔
آئی ایس پی آر کے مطابق کیپٹن سرور شہید نے 27 جولائی 1948 کو کشمیر کی پہلی جنگ میں تلپترہ سیکٹر کے محاذ پر دشمن کے خلاف لڑتے ہوئے جامِ شہادت نوش کیا۔
ان کی جرأت، ایثار اور مادرِ وطن سے غیر متزلزل وفاداری نے انہیں قومی تاریخ میں امر کر دیا ہے۔ پاک فوج نے کیپٹن سرور شہید کی عظیم قربانی کو سلام عقیدت پیش کرتے ہوئے کہا کہ ان کا جذبہ نئی نسل کے لیے مشعلِ راہ ہے۔
آج ان کے مزار پر گارڈ آف آنر دیا جائے گا اور پھولوں کی چادر چڑھائی جائے گی۔ قوم بھرپور انداز میں اپنے اس بہادر سپوت کو خراجِ عقیدت پیش کر رہی ہے، جبکہ مختلف شہروں میں تقاریب کا انعقاد کیا گیا ہے جن میں ان کی جرأت مندانہ خدمات کو یاد کیا جا رہا ہے۔
پاک فوج کا کہنا ہے کہ کیپٹن سرور شہید کی قربانی ہماری عسکری تاریخ کا وہ سنہرا باب ہے جس پر پوری قوم بجا طور پر ناز کرتی ہے۔
