ملتان: بورے والا کے ایک رکشا ڈرائیور کے بیٹے محمد احمد نے میٹرک کے امتحانات میں شاندار کامیابی حاصل کرتے ہوئے اپنے والد کا سر فخر سے بلند کر دیا۔
محمد احمد نے آرٹس گروپ میں 1161 نمبر حاصل کر کے نمایاں پوزیشن حاصل کی اور سب کو پیچھے چھوڑ دیا۔ اس باصلاحیت طالب علم کا تعلق بورے والا کے ایک گاؤں سے ہے، جہاں اس نے مدرسہ جامعہ حنفیہ سے میٹرک کا امتحان دیا تھا۔
نوجوان کی اس کامیابی پر اہلِ خانہ خوشی سے سرشار ہیں، جبکہ محلے داروں نے بھی اس پر فخر کا اظہار کیا ہے۔
میڈیا سے گفتگو کرتے ہوئے محمد احمد نے کہا کہ ان کے والد نے نہ صرف تعلیمی اخراجات برداشت کیے بلکہ ہر لمحہ حوصلہ افزائی بھی کی۔ وہ اکثر کہتے تھے: “میں تو نہیں پڑھ سکا، لیکن میرا بیٹا میرا نام روشن کرے گا۔”
محمد احمد کے والد محمد افضل نے کہا کہ آج ان کا خواب پورا ہو گیا ہے، اور وہ بے حد خوش ہیں کہ ان کا بیٹا تعلیم میں کامیاب ہوا — ایک خواب جو انہوں نے خود نہ سہی، اپنے بیٹے کی آنکھوں سے پورا ہوتے دیکھا۔
