پشاور: خیبرپختونخوا حکومت نے صوبے میں بدامنی کے بڑھتے واقعات کے پیش نظر 24 جولائی کو آل پارٹیز کانفرنس بلانے کا فیصلہ کیا ہے، جس کا مقصد امن و امان کی بحالی کے لیے مشترکہ لائحہ عمل تیار کرنا ہے۔
وزیراعلیٰ علی امین گنڈاپور نے مختلف سیاسی جماعتوں اور مذہبی و سماجی حلقوں کو باضابطہ دعوت نامے جاری کرتے ہوئے کہا کہ دہشت گردی کا مؤثر مقابلہ صرف تب ہی ممکن ہے جب تمام قوتیں ایک پلیٹ فارم پر متحد ہوں۔
انہوں نے کہا کہ امن کا قیام ہم سب کی مشترکہ ذمے داری ہے اور ہمیں سیاسی اختلافات سے بالاتر ہو کر اس مقصد کے لیے متحد ہونا ہوگا۔
ملکی حالات پر گفتگو کرتے ہوئے علی امین گنڈاپور نے کہا کہ پاکستان میں انصاف کا نظام تباہ ہو چکا ہے، اور پی ٹی آئی رہنماؤں کو دی جانے والی سزائیں آئین اور قانون کی صریح خلاف ورزی ہیں۔
انہوں نے ڈاکٹر یاسمین راشد اور دیگر رہنماؤں کو سنائی گئی سزاؤں کو ظلم قرار دیا اور کہا کہ تاریخ ان فیصلوں کو کبھی معاف نہیں کرے گی۔
وزیراعلیٰ نے پرعزم لہجے میں کہا کہ ہر ظلم کی شب کا ایک اختتام ہوتا ہے، اور حق کی فتح یقینی ہے۔ انہوں نے دوٹوک الفاظ میں کہا کہ وہ پی ٹی آئی کے بانی کے ساتھ پہلے بھی کھڑے تھے، آج بھی ہیں اور ہمیشہ رہیں گے۔
آخر میں وزیراعلیٰ نے نعرہ لگایا: ’’بانی پی ٹی آئی زندہ باد، پاکستان پائندہ باد‘‘۔
