تہران: غیر معیاری اور پانی ملا پیٹرول ایرانی صدر مسعود پزشکیان کی سرکاری گاڑیوں کو ناکارہ کر گیا، جس کے بعد انہیں ٹیکسی کے ذریعے سفر کرنا پڑا۔
ایرانی میڈیا کے مطابق صدر پزشکیان تبریز شہر کے دورے پر تھے جب ان کے قافلے کی تین گاڑیوں میں قزوین کے ایک پیٹرول پمپ سے ایندھن ڈلوایا گیا۔ تاہم پیٹرول میں پانی کی آمیزش کے باعث گاڑیاں دورانِ سفر بند ہو گئیں۔ قافلہ رکنے کے بعد صدر نے مقامی حکام کو اطلاع دیے بغیر ایک نجی ٹیکسی حاصل کی اور تبریز پہنچے۔
حکام کے مطابق تحقیقات سے معلوم ہوا ہے کہ مذکورہ پیٹرول پمپ غیر معیاری پیٹرول فراہم کرنے میں پہلے بھی ملوث رہ چکا ہے۔ ایرانی نیشنل آئل پروڈکٹس ڈسٹری بیوشن کمپنی نے بھی اس بات کی تصدیق کی ہے کہ اس اسٹیشن کے خلاف پہلے بھی شکایات موصول ہو چکی تھیں، لیکن یہ واضح نہیں ہو سکا کہ اسے بند کیوں نہیں کیا گیا۔
تاحال صدارتی دفتر یا وزارتِ تیل کی جانب سے واقعے پر کوئی باضابطہ بیان سامنے نہیں آیا۔
