اسلام آباد: پاکستان اور چین کے درمیان سمعی و بصری اور نشریاتی میدان میں تعاون کو مزید بڑھانے کے لیے ایک اہم معاہدے پر دستخط ہو گئے ہیں، جس کا مقصد میڈیا کے شعبے میں تجربات کا تبادلہ اور مشترکہ منصوبوں کا آغاز ہے۔
اس معاہدے پر پاکستان کی جانب سے وفاقی سیکریٹری اطلاعات عنبرین جان اور چین کی نیشنل ریڈیو اینڈ ٹیلی ویژن ایڈمنسٹریشن (NRTA) کے نائب وزیر ڈونگ شن نے دستخط کیے۔
حکام کے مطابق، یہ معاہدہ دونوں ممالک کے درمیان روایتی میڈیا تعلقات کو مزید مضبوط کرے گا اور جدید نشریاتی تقاضوں کے مطابق سمعی و بصری میدان میں مشترکہ کاوشوں کے نئے دروازے کھولے گا۔
اس اشتراک کے ذریعے دونوں ممالک کے میڈیا ادارے مشترکہ پروڈکشن، معلومات و مواد کا تبادلہ، اور تکنیکی تربیت جیسے شعبوں میں مل کر کام کر سکیں گے۔
معاہدے میں اس بات پر بھی اتفاق کیا گیا کہ میڈیا کے ذریعے دونوں اقوام کو ایک دوسرے کی ثقافت، روایات اور ترقیاتی سفر سے آگاہ کیا جائے گا، جس سے نہ صرف باہمی تعلقات مضبوط ہوں گے بلکہ میڈیا پروفیشنلز کی صلاحیتوں میں بھی نکھار آئے گا۔
یہ معاہدہ اس بات کی نشاندہی کرتا ہے کہ پاکستان اور چین اب صرف معیشت اور تجارت تک محدود نہیں بلکہ میڈیا اور ثقافتی تعاون کو بھی باہمی تعلقات کا اہم جزو بنا رہے ہیں۔
