وزیراعظم شہباز شریف سے انڈونیشیا کے وزیر دفاع کی ملاقات، دوطرفہ تعاون بڑھانے پر اتفاق

اسلام آباد: وزیراعظم محمد شہباز شریف سے انڈونیشیا کے وزیر دفاع لیفٹیننٹ جنرل (ر) سیافری سمسودین نے اہم ملاقات کی، جس میں دونوں ممالک کے درمیان مختلف شعبوں میں تعاون کو مزید وسعت دینے کے عزم کا اظہار کیا گیا۔
وزیراعظم نے ملاقات کے دوران قاہرہ میں جی-8 سربراہی اجلاس کے موقع پر انڈونیشیا کے صدر پرابوو سوبیانٹو سے اپنی ملاقات کو یاد کرتے ہوئے ان کے لیے نیک خواہشات کا پیغام دیا۔
ملاقات میں پاکستان اور انڈونیشیا کے دیرینہ، دوستانہ اور برادرانہ تعلقات پر تبادلہ خیال کیا گیا۔ وزیراعظم نے کہا کہ دونوں ممالک تاریخی، ثقافتی اور مذہبی اقدار میں یکجہتی رکھتے ہیں اور عالمی فورمز پر ہمیشہ ایک دوسرے کا ساتھ دیتے آئے ہیں۔
وزیراعظم نے باہمی تعلقات کو معیشت، تجارت، دفاع، اور دفاعی پیداوار سمیت تمام شعبوں میں مزید مستحکم بنانے پر زور دیا۔
دونوں رہنماؤں نے دوطرفہ کثیرالجہتی تعاون کو فروغ دینے، دفاعی معاہدوں کو جلد نافذ کرنے، اور باہمی مفاد پر مبنی منصوبوں میں سرمایہ کاری بڑھانے کی ضرورت پر اتفاق کیا۔
لیفٹیننٹ جنرل (ر) سیافری سمسودین نے انڈونیشیا کی جانب سے وزیراعظم شہباز شریف اور پاکستانی عوام کے لیے نیک تمناؤں کا اظہار کیا اور دفاعی تعاون کے دائرہ کار کو وسعت دینے کی خواہش ظاہر کی۔