صوبائی وزیر ثقافت و سیاحت سید ذوالفقار علی شاہ نے اداکارہ حمیرا اصغر کی تدفین کا انتظام محکمہ ثقافت کی طرف سے کرنے کا فیصلہ کیا ہے۔
رپورٹ کے مطابق صوبائی وزیر نے ایڈیشنل آئی جی کراچی سے رابطہ کیا اور اداکارہ حمیرا اصغر کی تدفین کے حوالے سے بات چیت کی۔
انہوں نے ڈائریکٹر جنرل کلچر کو اس معاملے کا فوکل پرسن مقرر کیا اور کہا کہ اگر مرحومہ اداکارہ کے ورثاء لاش وصول یا تدفین نہیں کرتے تو محکمہ ثقافت ان کا قانونی وارث ہوگا اور تدفین کے تمام انتظامات خود کرے گا۔
سید ذوالفقار علی شاہ نے سیکریٹری ثقافت سندھ کے ذریعے ڈی آئی جی ایسٹ کو خط بھی بھیجا جس میں واضح کیا گیا کہ حمیرا اصغر لاوارث نہیں ہیں اور سندھ حکومت کا محکمہ ثقافت ان کا وارث ہوگا۔ انہوں نے کہا کہ یہ واقعہ نہایت افسوسناک ہے اور تدفین کے تمام مراحل، بشمول قبرستان کی بندوبست، محکمہ ثقافت کے ذمے ہوں گے۔
صوبائی وزیر نے مزید کہا کہ سب سے پہلی کوشش یہی ہے کہ اداکارہ کے والدین لاش وصول کریں، اور پولیس کے تعاون سے محکمہ ثقافت اس معاملے میں بھرپور کردار ادا کرے گا۔
