اسلام آباد: پاکستان اور امریکہ کے درمیان جاری تجارتی مذاکرات میں اہم پیش رفت ہوئی ہے، دونوں ممالک نے آئندہ ہفتے تجارتی معاہدہ مکمل کرنے پر اصولی اتفاق کر لیا ہے۔
وزارتِ خزانہ کے مطابق، وفاقی وزیر خزانہ سینیٹر محمد اورنگزیب اور امریکی سیکریٹری برائے تجارت ہاورڈ لٹنک کے درمیان ورچوئل اجلاس ہوا، جس میں باہمی ٹیرف (Reciprocal Tariffs) کے حوالے سے تفصیلی بات چیت کی گئی۔ دونوں فریقین نے مذاکرات کی موجودہ رفتار پر اطمینان کا اظہار کیا اور آئندہ ہفتے تک تمام تفصیلات طے کرنے کے عزم کا اعادہ کیا۔
اجلاس میں یہ بھی طے پایا کہ مستقبل میں پاکستان اور امریکہ کے درمیان ایک جامع شراکت داری تشکیل دی جائے گی، جو باہمی مفادات پر مبنی ہوگی اور اس میں سرمایہ کاری، تجارت، اسٹریٹیجک تعاون اور دیگر اہم شعبوں کو شامل کیا جائے گا۔
وزارتِ خزانہ کے مطابق، یہ شراکت داری دونوں ممالک کے لیے یکساں فوائد کی حامل ہو گی، جبکہ آئندہ ہفتے تکنیکی سطح پر مذاکرات مکمل کیے جانے کی توقع ہے۔ فریقین نے تجارتی معاہدے کو جلد حتمی شکل دینے پر مکمل اعتماد کا اظہار کیا ہے۔
