تہران: ایران نے 12 روزہ اسرائیلی حملوں کے دوران ہونے والے جانی و مالی نقصانات کی تفصیلات جاری کردی ہیں جن میں عام شہریوں کے ساتھ طبی ادارے بھی نشانہ بنے۔
ایرانی وزارت صحت کے ترجمان حسین کرمانپور کے مطابق گزشتہ 12 روز میں اسرائیلی افواج کے حملوں میں 610 افراد شہید ہوئے، جن میں 13 بچے (بشمول ایک دو ماہ کا شیرخوار) اور 49 خواتین شامل ہیں۔ اس کے علاوہ 5 طبی عملے کے ارکان بھی حملوں کا نشانہ بنے۔
ترجمان کے مطابق مجموعی طور پر 4 ہزار 746 افراد زخمی ہوئے جن میں سے 971 تاحال مختلف اسپتالوں میں زیر علاج ہیں، جبکہ 687 زخمیوں کی سرجری بھی کی گئی۔
ایرانی وزارت صحت کے مطابق اسرائیلی حملوں کے نتیجے میں طبی سہولیات کو شدید نقصان پہنچا ہے۔ اب تک 7 اسپتال، 9 ایمبولینسز، 6 ایمرجنسی بیس مراکز اور 4 کلینکس تباہ ہوچکے ہیں، جس کی وجہ سے متاثرہ علاقوں میں صحت کی خدمات کی فراہمی میں رکاوٹ پیدا ہو رہی ہے۔
یاد رہے کہ ایران اور اسرائیل کے درمیان 12 دنوں تک جاری رہنے والی جھڑپوں کے بعد امریکی اور قطری ثالثی سے فریقین جنگ بندی پر متفق ہو گئے ہیں۔
